Format: Mass Market Paperback
My rating: ★★★☆☆
Binili ito ng kaibigan ko sa nakaraang book drive ng book club ko dito sa Goodreads, ang Pinoy Reads Pinoy Books. Nakuha namin itong libro nung Readercon, at sakto, nandun din ang awtor ng libro na si Bebang Siy (para sa Mingaw, “Frida Mujer” ang ginamit nyang sagisag-panulat), na myembro din ng aming book club. Nung nakita nya kaming hawak ang libro, tinanong nya kung saan namin nakuha yon. Nanlalaki ang mata nya at pabiro nyang sinabi na bata pa daw kami para sa libro (kahit na magbebente na ko kinabukasan nang araw na ‘yon).
Nasa pabalat ng aklat na ang Mingaw ay isang R-18 na erotika. Nang Ginoogle ko ang kahulugan neto, ang “mingaw” ay isang salitang Bisaya para sa deserted (adj.) o lonely (adj.). Kwento ito ng mag-asawang si Gelli at Scott, na nakikipagbuno sa hirap ng buhay-OFW. Napilitan si Scott na mangibang bansa sa pag-asang magkaroon sila ng mas magandang buhay, ngunit ito pala ang simula ng kanilang pangungulila at iba pang problema sa kanila relasyon.
Dahil nga erotika, maraming mga sex scenes sa libro. Sa pagpapalitan din ng email ng mag-asawa, dini-describe nila ang iba’t ibang posisyon sa pagtatalik na nais nilang gawin sa isa’t isa. Para sa akin hindi naman bastos ang dating ng pagkakalahad nito. Malamang ay natural lang naman ito sa buhay mag-asawa. May mga pagkakataon pa na nga na bahagyang nagpapatawa ang awtor sa mga tagpo.
Nakakatuwa din na hindi lamang ito ang klase ng erotika na ang tanging hangad lamang ay magpalibog. Gaya nga ng sabi ko, hindi naman talaga bastos ang pagkakalahad nito kahit pa may mga maseselang salita ang ginamit. Binubuksan ng kwentong ito ang realidad ng buhay mag-asawa, ang hirap na dinadanas ng mga OFW sa ibang bansa, at ang katotohanan na marami sa ating mga kababayan ang pinipili pang nangibang-bayan upang kumita ng mas malaking pera. Samakatuwid, hindi lamang ito isang “nonsense erotica,” bagkus ang Mingaw ay nagtatalakay ng mga isyu sa ating lipunan.
Totoo nga naman na kahit nga mga prospesyonal sa ating bansa mas pipiliin pang hindi i-practice ang kanilang propesyon at magtrabaho na lang bilang isang factory worker sa abroad dahil mas malaki ang kita doon kesa tuparin ang kanilang propesyon dito sa Pilipas. Naalala ko tuloy ang kanta ni Gloc9 na “Walang Natira.” Tapos karamihan din sa ating mga Pilipino ang tingin natin sa mga nag-aabroad eh napakayaman porke nakatapak sa ibang bansa, kaya naman buong kamag-anak ay dun sa OFW umaasa. Akala natin asensado na agad, ngunit napakahirap ng dinadanas nila sa ibang bansa at minsan hindi naman talaga ganun kalaki ang sinusweldo nila. Minsan din, may mga asawa na binabaling ang atensyon sa iba upang matugunan ang kanilang pangungilala at pangangailangan.
Bukod sa maayos na erotikang paglalahad, maganda ang mensaheng nais iparating ng Mingaw. Mula noong nailimbang ito noong 2006 hanggang ngayon, buhay pa rin ang mga isyu tinatalakay sa libro. Maikli lang ang kwento at manipis ang aklat kaya natapos ko agad sa isang upuan. Para din ito sa mga “matured readers” na bukas ang pag-iisip na magbasa ng ganitong klase ng aklat.
Originally posted here.
Pixie Stargirl 